Hertzogpryswennerhuldigingsreeks

Etienne Leroux het die moderne Wes-Europese en veral (Suid-) Afrikaanse mens en werklikheid van die grootste gedeelte van die twintigste eeu op ʼn verbluffend-oorspronklike wyse artistiek gedokumenteer. Die psigologie (van veral Carl Gustav Jung), mitologie, satire en selfs die populêre kultuur, vorm skering en inslag van sy gevarieerde oeuvre. Deurgaans word ʼn ingewikkelde verwysingsveld in bedwang gehou deur ʼn toeganklike oppervlaktestruktuur en veerligte aanslag, vol humor en ironie. Hierdie publikasie deur letterkundiges en digters is ʼn veelkantige huldeblyk aan Leroux en sentrale aspekte van sy werk word hier - dikwels deur die gebruik van nuwe teoretiese invalshoeke onder die soeklig geplaas. So kom verrassende nuwe insigte na vore en word onomwonde getoon dat Leroux se plek in die (Suid-)Afrikaanse literêre kanon stewig verskans is. Herskrywing en herinterpretasie is altyd ʼn huldebetoon; in die geval van Leroux (met onder meer twee Hertzogpryse en drie eredoktorate tot sy krediet), welverdiend.

Hierdie publikasie is die twaalfde in die reeks, aangebied deur die Suid-Afrikaanse Akademie vir Wetenskap en Kuns, wat hulde bring aan literêre kunstenaars wat met die Hertzogprys bekroon is en wat oor dekades Afrikaans en die Afrikaanse letterkunde met hul werk verryk het. Hoewel die Hertzogprys met sy lang tradisie van meer as ʼn eeu binne die bestel van literêre pryse nie die hoogste in geldwaarde is nie, het die verwerwing daarvan ʼn besondere prestigewaarde en is dit steeds ʼn vlagskipprys in die Suid-Afrikaanse literêre wêreld. Publikasies oor Adam Small, P.G. du Plessis, Pieter Fourie, Breyten Breytenbach, Johann de Lange, Reza de Wet, N.P. van Wyk Louw, Anna M. Louw, Elsa Joubert en Bartho Smit het reeds in dié reeks verskyn.

Wikipedia