Hertzogpryswennerhuldigingsreeks

Reza de Wet (1952–2012) se vroeë afsterwe het ʼn groot leemte in die Suid-Afrikaanse teatergemeenskap, asook in internasionale teaterkringe waar haar werk veral in Engeland gewild was, gelaat. Sy was ʼn gerekende aktrise en regisseur, maar dit is as uitmuntende dramaturg dat sy onthou sal word. Meer as ses-en-twintig dramas in Afrikaans en Engels word deur haar geskryf, en vele word in verskeie tale vertaal. De Wet is twee keer met die Suid-Afrikaanse Akademie vir Wetenskap en Kuns se Hertzogprys vir drama bekroon en het ook talle ander teater- en literêre pryse ontvang. Haar unieke aanslag kan moeilik in enkele woorde (magies, sprokiesagtig, misterieus, misties, grotesk, Goties) vasgevat word, maar dalk omvat die woord dromer iets van haar bowêreldse persona. In dié bundel word die idee van die dramaturg as dromer as oorkoepelende begrip ingespan om die enigma van iemand soos Reza vas te vang, iemand vir wie enigiets in die dromespel moontlik was.

Die bundel bestaan uit twee dele. In Deel I word ʼn persoonlike blik op haar lewe en werk deur haar Afrikaanse uitgewer (Marietjie Coetzee), haar jare lange regisseur (Marthinus Basson) en verskeie ander kollegas binne die teaterwese gegee. In Deel II dra sewe akademiese hoofstukke by tot die bestaande korpus navorsing oor een van ons land se belangrikste dramaturge.

Wikipedia