Hertzogpryswennerhuldigingsreeks

In hierdie huldigingspublikasie word daar met vars oë gekyk na Ina Rousseau as digter, kortverhaalskrywer en vertaler. Sy was ʼn eindeloos presiese en perfeksionistiese samevoeger van klinkende frases wat langsaam oor ʼn tydperk van vyf dekades soos ʼn koraalrif aangegroei het tot verse, digbundels en ʼn indrukwekkende oeuvre. Haar heilsame, ambagtelike invloed is duidelik te bespeur in die werk van Afrikaanse digters sedert die tagtigerjare van die vorige eeu. Rousseau se Engelse vertalings van haar eie gedigte is ook by hierdie bundel ingesluit. Dit is nog nêrens elders volledig gepubliseer nie. Sy ontvang die Reina Prinsen Geerligsprijs voor Zuid-Afrika vir haar debuut Die verlate tuin (1954) en die Hertzogprys vir haar laaste selfstandige bundel ʼn Onbekende jaartal (1995). Hierdie twee bekronings omkring as't ware haar skrywersloopbaan: ʼn kwiksilwersirkel.

Hierdie publikasie is die veertiende in die reeks aangebied deur die Suid-Afrikaanse Akademie vir Wetenskap en Kuns, wat hulde bring aan literêre kunstenaars wat met die Hertzogprys bekroon is en wat oor dekades Afrikaans en die Afrikaanse letterkunde met hul werk verryk het. Hoewel die Hertzogprys met ʼn lang tradisie van meer as ʼn eeu binne die bestel van literêre pryse nie die hoogste in geldwaarde is nie, het die verwerwing daarvan ʼn besondere prestigewaarde en is dit steeds die vlagskipprys in die Suid-Afrikaanse literêre wêreld. Publikasies oor Adam Small, P.G. du Plessis, Pieter Fourie, Breyten Breytenbach, Johann de Lange, Reza de Wet, N.P. van Wyk Louw, Anna M. Louw, Elsa Joubert, Bartho Smit, Petra Müller, Etienne Leroux en Marlene van Niekerk het reeds in die reeks verskyn.

Wikipedia